स्पेनिस ला लिगामा बार्सिलोनाले शानदार जित निकाल्दै शीर्षस्थानमा पुनरागमन गरेको छ। बार्सिलोनाले अलाभेसलाई ६–१ गोलले पराजित गरेको हो।
एल क्लासिकोमा रियल मड्रिडसँग पराजित भएपछि बार्सिलोनाले उत्कृष्ट प्रदर्शन गर्दै जितको लय समातेको छ। बार्सिलोनाको जितमा लामिन यमाल र राफिन्हाले दुई-दुई गोल गरे। फर्मिन लोपेज र एन्थोनी गोर्डनले एक-एक गोल थपे।
खेलको आठौं मिनेटमै राफिन्हाले गोल गर्दै बार्सिलोनालाई अग्रता दिलाएका थिए। फर्मिन लोपेजको उत्कृष्ट पासमा उनले सहजै गोल गरे। त्यसको केही समयपछि लोपेज आफैंले गोल गर्दै अग्रता दोब्बर बनाए।
राफिन्हा र लोपेजले पुनः उत्कृष्ट तालमेल देखाउँदै बार्सिलोनाका लागि तेस्रो गोलको अवसर सिर्जना गरे। पहिलो हाफ सकिनुअघि यमालले उत्कृष्ट टिम मुभलाई गोलमा परिणत गर्दै बार्सिलोनालाई ४–० को अग्रता दिलाए।
विश्वका उत्कृष्ट पुरुष खेलाडीको सूचीमा तेस्रो स्थानमा रहेका यमालले दोस्रो हाफमा व्यक्तिगत दोस्रो गोल गरे। उनले अलाभेसका गोलरक्षक एन्टोनियो सिभेरालाई छक्याउँदै आकर्षक चिप प्रहारमा गोल गरेका थिए।
त्यसपछि वैकल्पिक खेलाडीका रूपमा मैदान प्रवेश गरेका एन्थोनी गोर्डनले पनि यमालकै शैलीमा गोल गर्दै बार्सिलोनाको अग्रता ६–० पुर्याए।
खेलको अन्तिम समयमा रोड्रीको कमजोर ब्याक पासको फाइदा उठाउँदै मारियानो डियाजले अलाभेसका लागि सान्त्वना गोल फर्काए।
यो जितसँगै बार्सिलोना एट्लेटिको मड्रिडलाई दुई अंकले पछि पार्दै ला लिगाको शीर्षस्थानमा उक्लिएको छ। एट्लेटिकोले शनिबार लेभान्तेलाई २–० ले पराजित गर्दै केही समय शीर्षस्थान ओगटेको थियो। एक खेल कम खेलेको रियल मड्रिड बार्सिलोनाभन्दा चार अंकले पछाडि छ।
व्यक्तिगत प्रदर्शनमा राफिन्हाले यस सिजन लिगमा गोल संख्या १५ पुर्याएका छन्। उनी सर्वाधिक गोलकर्ताको सूचीमा शीर्षस्थानमा छन्। दोस्रो स्थानमा रहेका रियलका किलियन एम्बाप्पेको ११ गोल छ भने यमाल १० गोलसहित तेस्रो स्थानमा छन्।
